احذروا والله يا ناس!
ديل كل مرة بجيبوا طريقة جديدة، وأنا دايرك تكون نبيه شديد.
🔴 أول نوع:
ديل بتاعين المنظمات.
او تحويلات خطاء ❌
الزول يرسل ليك يقول ليك:
في منظمة نزلت ليك قروش وأنا داير أوريك كيف تنزلها.”
او عندك قروش حولته و داير ترجعها
وطبعاً إنت بتفرح ساي (يا فارة 😂)،
تقوم تتابع معاه خطوة بخطوة.
يقول ليك:
خش بنكك، اضغط على أيقونة بنكك باي، ح يجيك ماسح… وتحتو أكتب الكود ده.”
طبعاً الكود ده في الحقيقة رقم حسابو هو 😅
لكن إنت في اللحظة دي همّك كيف تقبض قروش “المنظمة”.
يقول ليك:
بجيك اسم الموظف المسؤول.”
وفعلاً بجيك اسم مقنع، وكمان بوريك إنو المبلغ نزل.
ويقوم يديك رقم بالشكل ده مثلاً: 150666
عشان ما تنتبه إنو الرقم ده مبلغ بتحوله ليهو.
قبل ما يعمل الحركة دي، يسألك:
الحساب فيهو كم؟”
ويحسبها مظبوطة عشان يكوش على القروش كلها.
المهم… تلقى نفسك حولت لي زول عديل
وتشوف الإشعار الأخضر طالع ليك، وبطنك تطم وتقول:
يا سلام، القروش جات”
لكن الحقيقة؟
إنت اتحلبت ساااااي 😂💔
وفي ناس بمجرد ما يشوفوا الإشعار، بيشكّوا وبيسحبوا،
نفسهم وفي ناس بيكملوا في الفيلم للنهاية.
وطبعاً أكتر ناس معرضين للحتة دي هم الناس البحولو تحويلات خطأ أو بيفتشوا على قروش ضايعة.
ودي الناس الحرامية مركزين عليهم.
📌 يلا تعال أديك مثل حقيقي حصل قدامي
زول جغمو 7 مليون ونص (يعني 7 مليار بالقديم )
بنفس الطريقة دي.
هو أساساً حول قروش بالخطأ،
لقى رقم في الفيسبوك بقول بيرجع التحويلات الخطأ.
صحبك اتواصل مع “الموظف” (أقصد الحرامي)،
وبدت عملية الجغم بـ 3 تحويلات منفصلة:
1️⃣ أول تحويلة كانت 2,999,999
2️⃣ التانية نفس الرقم 2,999,999
3️⃣ التالتة كانت 1,666,666
والزول كان مفكّر إنها “أكواد استرجاع المبلغ” 😂
قال ليهو:
“دي بس خطوات التحقق، المبلغ بعد داك بننزلو ليك كامل.”
وكان داير يغشّو للمرة الرابعة لكن الحساب فضى خلاص 🤣
صحبك هنا دخل في صدمة عمره،
وإلى الآن جاري ورا الإجراءات عشان يحاول يسترجع القروش.
🔴 بالمناسبة… معلومة مهمة شديد:
أكتر من 90% من الحسابات البنحول ليها في النوع دا من الاحتيال،
بتكون بتاعة ناس بسطاء ساكت،
زي زول فاتح دكان، كشك، أو زول ببدل بنكك مقابل كاش.
يعني الحرامية بيستغلوا حسابات ناس ما عندها ذنب،
وده البضيع .
عشان كده اي زول عندو تحويلات و كبير يتاكد او من اتجاها القروش جاي من وين
💔 أنا حكيت القصة دي عشان أي زول يعمل حسابو.
والله يا شباب، الموضوع مهلك شديد.
لو لا الإطالة، في قصة تانية درعة عديل
لكن في البوست الجاي إن شاء الله 😏
📢 أهم تنبيه:
الناس ديل بيركزوا على الواتساب بس.
رسائل، روابط، مكالمات… كلها فخاخ.
أي رابط جاك في واتساب عن “قروش”؟
إرجع خطوة واسأل نفسك: ليه أنا؟
🎯 العبرة شنو؟
القروش البتنزل ساكت، بترجع طايرة.
وأي زول يقول ليك “في منحة جاهزة” بدون ما تقدم؟
أعرف إنك الضحية القادمة.
خليك واعي،
النية الطيبة من غير وعي = دعوة مفتوحة للحرامية.
وفي النهاية نقول:
المنظمة الوهمية” دي أكتر منظمة وزعت قروش في السودان
لكن للأسف… كلها من جيبنا نحنا!
